Mi isla.

Mi a sintimi inspira pa skibi algu otro for di loke mi tabatin plania pa 'blog', pa motibu ku mi no por kontene e gana mas di ekspresá un preokupashon di mi. I mi sa ku lokual mi ta bai trese dilanti ta algu ku hopi ta esnan ku por relata nan mes kompartíendo e preokupashon i tristesa aki ku mi.

Mi dushi Kòrsou, mi ta sinti bo doló!

Mi ta haña un rabia inmenso di mira bo sufri asina.

Un rabia inmenso di sinti bo ta sklama, sin ku mi por hasi nada pa kalma e doló.

Un rabia inmenso i bashí den mi kurason di mira kon bo ta muriendo ku dia.

Mi dushi Kòrsou, mi ta sinti bo doló!

Di mira kon bo yunan no ta balorá bo.

Di mira kon bo yunan no ta karga bo.

Di mira kon bo yunan no ta kuida bo.

Di mira kon bo yunan mes tin bo sklamando!

Mi dushi Kòrsou, mi ta sinti bo doló!

I mas ainda ku ta falta di nos mes komo bo yunan,

ku nos mentalidat yená ku negativismo i odio,

nos aktonan violento i sin komprenshon,

i di nos sistema ku no por manehá i ta laga di deseá.

Ái, mi Kòrsou!

Ku ki kara nos ta yama nos mes bo yunan?!

Ku ki kara nos ke ta orguyoso di nos mes i isla?!

Ku ki kara nos ke mira kambio sin ta klá pa ta un kambio?!

Ku ki kara?!

Bo ta un isla asina bunita, pero chikí pa mira tantu negativismo ariba.

Ki dia nos ta kuminsá lanta i sali for di e sírkulo visioso kargá ku negativismo ei? Kaminda nos mes ta kaba ku otro i tambe kaba ku nos pida baranka ku ta nos deber di kuida.

Ta basta!

Kòrsou!

Si bo ta orguyoso i stima bo isla, kuminsa na stima bo mes i otro pa e amor ei tene nos isla na bida. Si abo komo su yu ke kuida e isla i ke mira kambio na nos mentalidat i aktonan komo pueblo, kuminsá na tá un kambio abo mes promé!

No laga nos lanta ariba ora ya no tin kaminda pa para!