Loke bo pensa bo ta atrae

Nos mente ta tur kos. Loke nos pensa nos ta bira ...

 

Kuantu biaha bo no a yega di tende of lesa e dicho aki un kaminda? Bo a yega di para ketu i medita riba e dicho aki? 

Universo ta draai den un sirkulo. Tur loke bai mester yega bek un momentu of otro, por ta awe, mañan, otro luna of asta aki par di aña, pero e lo yega bek na e momentu adekua.

Hopi di nos ta pensa, aktua, papia i biba un manera negativo, nos ta laga negativismo tuma kontrol di nos. Despues nos ta keda straño dikon sierto kosnan ta bai menos bon den nos bida.

Por ehempel a bira algu normal kaba ku ora un persona puntra otro kon ta bai kune i su bida, nan ta responde kosnan manera; "ata nos aki den lucha", "kos ta malu", "bon pero kansa di traha sin mira kambio", " nos tei, por miho pero nos tei"

Bo no a para ketu of pensa nunka ku ta esei por ta di gran influensha riba bo bida? Bo no a pensa nunka ku ta e palabra nan ei por ta faktor di bo situashon den bida? 

Ora bo brota negativismo e ta bini bek pabo!

Bida por ta kruel, bida por ta duru, bida por ta inhustu, bida por ta tur kos! Pero ta keda na abo komo persona pa surpasa tur obstakulo i sigui pa dilanti. Ta keda na abo pa kibra tur muraya forma pa stroba bo di bai dilanti. Ora bo kai no deskurasha, ora bo kai soru pa bo lanta ariba drecha bo kurpa pone un sonrisa na bo kara i sigui pa dilanti, pasobra e simpel sonrisa ei ku bo a pone ta pone ku bo lo desvia mayoria obstakulo i ta pone ku ya bo lo no kai mas. NOS TA ATRAE LOKE NOS TA ...

Mi mes komo persona a kai hopi den bida. No ta paso mi ta hoben kemen ku ta imposibel ku mi a pasa den sierto situashon nan. Kontrali bo edat no ta defini bo madures di lucha di bida! Bo sa ki ami komo persona a hasi? Mi a tuma e kurashi di dal e prome stap den kambia mi manera di pensa i aktua, mi a kuminsa hiba un bida mas salu i positivo. E kambio aki a pone ku HOPI kos den mi bida a kambia, e la pone ku mi a hañami ku oportunidat nan di oro, ku mi bida ta bayendo hopi mas miho i ku awor mi ta e persona ku mi ta aki fuerte den mi sapatu lagando mi mensahe atras pa abo sinti e konekshon kumi. Mi no ta gaña boso mi sa yega na e punto nan di trompeka atrobe den mi bida, mi sa asta kai, paso mi tambe ta hende. Pero esei no ta nifika ku mi ta i lo laga negativismo tuma kontrol di mi bida! NO! Abo tampoko mester laga esei pasa!

Ami no por papia pa abo! Pero si mi por papia pa mi mes i yuda inspira i motiva abo pa pensa otro i pa ta e kambio den bo mes bida. Mi no sa nada di tur e obstakulo nan ku bo a pasa i of ta pasando aden, pero si mi por yuda alivia i duna bo e kurashi pa sigui kana ku bo sonrisa. Mi no ta ken pa husga ni ken pa asumi. Pero si mi ta ken pa lantabo for di soño i sakabo for di bo buraku hasi bo fuerte i yuda pone un sonrisa na bo kara.

Tin diferente kos ku por yuda bo den dal e stap nan pa hasi bo bida mas positivo i habri pa kosnan bon. Kada persona ta diferente, pero e kambio ta pa nos tur!

"SEA E KAMBIO KU BO KE DEN BO BIDA"

            🌻radia positivismo🌻

Si bo ta interesa den konseho i of mas motivashon sintibo liber di laga un komentario atras i mi lo post mi mail!