Ami

Tin biaha mi ta sintimi mi so, manera ku mi no tin niun hende huntu ku mi. Mi ta sinti manera ku no tin niun hende ku ta kompronde mi. Ku ta kompronde mi aktitut, mi manera di pensa, mi pensamentu i ideanan i mi meta nan. Dikon mi ta sinti asina?

Mi ta buskando ken ami ta, porta bo tambe ku ta lesando lo ta den mesun situashon ku mi. Kiko di berdat ta nos proposito? Nos niun no sa, ni ami ni abo.

E ta kansami bo sa, paso kada ken ta pertenese na un grupo i of idealismo di bida, formando nan estilo di bida di kua ta esun ku nan ta biba. Pero ami, mi no sa na kua grupo i of idealismo mi ta pertenese. Mi no por kompronde dikon, mi ke purba di kompronde, pero no por kaba di kompronde.

Mi ta sinti sierto momentu nan ku mi NO ta pertenese den e "sosiedat" i "estilo di bida" ku tur hende ta boga i skohe pa biba. Mi ta sinti ku mi ta di otro epoka te asta otro universo. Mi manera di pensa ta stranjo, pero ta e realidat di mi bida! Pakiko biba un estilo di bida ku no ta yuda eleva i kompronde ami komo persona?

Mi ta en buska di ken mi ta i kiko ta mi proposito den e bida aki. Porta mi proposito ta pa trese un kambio, esei ta loke ta pasa hopi den mi kabes i tambe ta resalta na mi aktitut. Mi ke pa mi bos resona di un manera positivo i inspirativo den sosiedat. Mi ke inspira otro nan pa ta nan mes, biba na nan mes manera i pa esnan den mesun situashon kumi, pa huntu nos buska nos kaminda i trese un kambio huntu den sosiedat. Ami ta kere den i boga pa "knowledge", pa nos ta sabi i mente habri. Mi ta kere den mira bida otro, pa mira bida mas aleu di loke e sosiedat ku nos ta bibando aden ke pa nos mira. Mi ta kere den "wisdom" i "enlightentment", pa sinja konose nos mes i otro, pa sinja konose bida i tur kos ku ta rondo di dje. Mi no ta papia hopi, pero ora mi papia mi bos ta resona papiando ku logica, sentido i konosementu. Asina mi ta.

Mi ta berde awe i blou manjan. Bo ta mira e palu i e blachi kaminda ami ta mira e rais, forma i kolo. Mi mente no por stop di traha, mi ta pensa i analisa hopi, mi mente ta kai den trans imaginando sierto kosnan ku ta ineksplikabel i inkomprendibel pa otro.  Asina mi ta, niun hende no por kambia mi, pero si nan por asepta i sinja biba kumi.

Abo! bo sa ken bo ta i kiko ta bo proposito? Bo akshonan ta demostra ken bo ta, bo ta sigur ku ta ABO su propio akshonan of ku ta akshonan influensha? Sinta pensa ken bo ta. Paso meskos ku ami ta den buska di mi luga, abo tambe lo por ta sin ku bo ta konsiente di esaki.

Pa termina esaki ta un "quote" mi a hanja sumamente inspirativo pa mi mes, mi ta spera ku e lo ta inspirativo pa boso tambe....